केन्द्रीय संस्करण

बेलायतमा अलपत्र दुई सय नेपाली स्वदेश फर्किए

person explore access_timeसाउन १७, २०७७ chat_bubble_outline0

लन्डन । लन्डनस्थित हिथ्रो विमानस्थलबाट आज शनिबार दिउँसो दुई  सयको हाराहारीमा  नेपाली स्वदेश फर्किएका छन्  । लन्डनबाट कतार एअरवेजको क्यूआर ००४ नम्बरको फ्लाइटबाट उडेका नेपालीहरु कतारको दोहास्थित हम्माद अन्तरराष्ट्रिय विमानस्थलमा ट्रान्जिटका लागि अवतरण गर्नेछन्   ।

यसैगरी दोहाबाट भोलि आइतबार  स्थानीय समय अनुसार बिहान ६ बजेर ३५ मिनेटमा काठमाण्डौका लागि उड्ने कतार एअरवेज क्यूआर ३१६० नम्बरको जहाज नेपाली समय अनुसार दिउँसको १ बजेर ५५ मिनेटमा काठमाडौं अवतरण गर्नेछ ।

लकडाउनका कारण यूके लगायत युरोपका विभिन्न स्थानमा हजारौंको संख्यामा नेपालीहरु अलपत्र परेका छन् । लन्डनस्थित  हिथ्रो विमानस्थलको टर्मिनल ५ र बेलायतको  म्यानचेस्टरबाट पनि युरोपका विभिन्न स्थानका नेपालीहरु आजै स्वदेश फर्कदैछन् । 

बेलायतस्थित ट्राभल कन्सोलका निर्देशक बिराज भट्टका अनुसार आज नेपाल फर्कनेको संख्या दुई सयको हाराहारीमा रहेको छ ।

आज नेपाल फर्कनेमध्ये केम्यान आइल्याण्डमा पानीजहाज र होटलमा कार्यरत डेढ दर्जन नेपालीहरु र  लकडाउनका कारण माल्टामा अलपत्र परेका केहि नेपालीहरु समेत रहेको भट्टले जानकारी दिए । 

लकडाउनका कारण युरोप लगायत बेलायतमा अलपत्र नेपालीहरुको उद्धार कार्यमा  ट्राभल कन्सोलले संयोजनकारी भूमिका निर्वाह गर्दै आइरहेको छ । उद्धार कार्यमा लन्डनस्थित नेपाली दूतावास, गैर  आवासीय नेपाली संघ लगायतले पनि संयोजनकारी भूमिका निर्वाह गर्दै आएका छन् ।

नेपाल सरकारले निर्धारित गरेअनुसार अर्को हप्ता पनि नेपालका लागि उडानको तयारी भैरहेको छ । आज नेपाल फर्किनेहरुमा भिजिट भिसामा घुम्न आउनेको संख्या पनि निकै रहेको छ । भिजिट भिसामा लन्डन आएकी कमला खड्का  पनि हर्ष एवं उत्साहका साथ ५ महिनापछी नेपाल फर्किंदैछिन्। 

लकडाउनले गर्दा यसपटकको यात्रा खल्लो  भएको र आफूले नियमित रुपमा सेवन गर्दै आएको औषधीका कारण बढी झन्जट खेप्नुपरेको उनले बताइन् । तेस्तै एक महिनाको लागि नेपाल जान लागेका रनहांग राई र श्रीमती देवान कुमारी राई भने फेरी लकडाउन भएर नेपालमै रोकिनुपर्ने हो कि भन्ने चिन्तामा छन् ।

बेलायतबाट गत महिना पनि दुईवटा चार्टर फ्लाइट मार्फत २ सय २९ जना नेपालीहरु नेपाल फर्किसकेका छन् । नेपाली राजदूतावास लन्डन र गैर आवासीय नेपाली संघको संयुक्त पहलमा जजिरा एअरलाइन्सको उडानबाट प्राथमिकताका आधारमा उनीहरुलाई नेपाल फर्काइएको थियो । 

नेपाल सरकारले दिएको निर्देशन अनुसार केहि दिनदेखि स्थगित गरिएको चार्टर फ्लाइटलाई जुलाई ३१ तारिखबाट पुन चौथो चरणको लागि चार्टर मार्फत उद्धार कार्य संचालन भएको हो ।

आगामी भदौ १ गतेबाट सम्पूर्ण आन्तरिक तथा अन्तरराष्ट्रिय उडानहरु व्यावसायिक रुपमा संचालन गर्न पाउने घोषणा गरिसकेको छ । तर पछिल्लो समय नेपालमा बढ्दै गएको कोरोनाको संक्रमणका कारण उक्त निर्णयको कार्यान्वयन हुनेमा विश्वस्त सम्भावना अत्यन्त न्यून छ ।

रातोपाटीको अंग्रेजी, हिन्दीग्लोबल संस्करणका साथै अनलाइन टिभी पनि सञ्चालित छ । एप्सबाट सिधै समाचार पढ्न एन्ड्रोइडका लागि यहाँ र आइफोनका लागि यहाँ क्लिक गर्नुहोस् । फेसबुकट्वीटरमार्फत पनि हामीसँग जोडिन सकिनेछ ।

कमेन्ट

कमेन्ट गर्नुहोस्

info_outline

तपाईको ईमेल गोप्य राखिनेछ

This site is protected by reCAPTCHA and the Google Privacy Policy and Terms of Service apply.